Bu il Almaniyada güclü istilər nəticəsində ölənlərin sayı təxminən 12 500 nəfərə çatıb.
Az.shafaqna.com xarici mediaya istinadən xəbər verir ki, Almaniyada güclü istilərlə əlaqəli ölüm halları ilə bağlı avqustun 2-nə olan məlumatları əhatə edən hesabat yayımlanıb.
Hesabatda qeyd olunur ki, 2026-cı ilin 15-ci həftəsindən 31-ci həftəsinədək ölkədə güclü istilər səbəbindən təxminən 12 500 nəfər həyatını itirib.
Son 10 il ərzində, xüsusilə 2018 və 2019-cu illərdə güclü istilər nəticəsində ölənlərin sayı yüksək olub: 2018-ci ildə 9 400, 2019-cu ildə isə 7 700 nəfər ölüb.
Güclü istilər xüsusilə yaşlı insanlara təsir edir
Güclü istilərin xüsusilə yaşlı insanlara ciddi təsir göstərdiyinə diqqət çəkilən hesabatda bildirilir ki, bu il avqustun 2-dək istilər səbəbindən ölənlər arasında 6 270 nəfərin yaşı 85-dən yuxarı olub.
Bu il güclü istilər nəticəsində ölənlərin 1 900 nəfəri 65–74, 3 110 nəfəri isə 75–84 yaş arasında olub.
Hesabatın müəllifləri bildirirlər ki, ölənlərin sayı güclü istilərin müşahidə edildiyi bu ilin 26-cı həftəsində xüsusilə yüksək olub. Onların hesablamalarına görə, iyunun 22-dən 29-dək həddindən artıq istilər nəticəsində təxminən 9 600 nəfər həyatını itirib.
Bu dövrdə Avropanı bürüyən isti hava dalğası Almaniyaya da təsir edib. İyunun 28-də Brandenburq federal torpağının Oder-Şpre rayonundakı Naysemünde icmasının tərkibində yerləşən Koşen qəsəbəsində havanın temperaturu 41,7 dərəcə Selsiyə yüksəlib. Bu, yeni temperatur rekordu olub.
RKI-nin iyulun 9-da yayımladığı hesabatda bildirilirdi ki, 2026-cı ilin 15-ci həftəsindən 26-cı həftəsinədək Almaniyada güclü istilər nəticəsində təxminən 5 120 nəfər ölüb.
