Az.shafaqna.com “Belarus 1”-ə istinadən xəbər verir ki, Belarus prezidenti Aleksandr Lukaşenko bəyan edib ki, Rusiya Belarusu itirmək istəmir, çünki Minsk Moskvanın yeganə müttəfiqidir.
“Rusiyanın qalan yeganə müttəfiqi Belarusdur”, – deyə o bildirib.
O qeyd edib ki, bu barədə tez-tez Rusiya prezidenti Vladimir Putinə deyir.
“Mən tez-tez Putinə bu haqda deyirəm: mən səni başa düşürəm, sən Belarusu itirə bilməzsən. Başa düşürəm ki, Belarusu saxlamaq üçün sən müharibə edə bilməzsən. Niyə? Çünki Rusiyanın olduqca marjinal bazarlardan sıxışdırılıb çıxarılması prosesi başlayıb: a) Avropa İttifaqının, b) Ukraynanın (bazarlarından)”, – deyə Lukaşenko bildirib.
Onun sözlərinə görə, Almaniyadan sonra Belarus Rusiyada ən çox qaz alan 2-ci ölkədir, həmçinin iri neft idxalçısıdır.
O deyib ki, Belarusu itirmək – “Rusiyanın daxili siyasətinə ən güclü zərbədir”.
Xatırladaq ki, daha öncə Lukaşenko bildirmişdi ki, Belarusun başqa ölkələrlə əməkdaşlığı inkişaf etdirmək niyyətinə baxmayaraq, Minsk heç vaxt “qardaş Rusiya” ilə münasibətləri kəsməyəcək.
