Az.shafaqna.com TASS-a istinadən xəbər verir ki, İran COVAX vasitəsi ilə milyonlarla doza vaksin əldə etməyi planlaşdırsa da, ABŞ sanksiyaları buna mane oldu.
Bunu İran prezidenti Həsən Ruhani bildirib.
“Əgər sanksiyalar olmasa idi, o zaman COVAX vasitəsi ilə Esfənd ayında (İran təqvimi ilə 19 fevral – 20 mart tarixlərini əhatə edir) tədarüklər olardı və bu gün milyonlarla insan vaksin əldə etmiş olardı”, – deyə o qeyd edib.
Onun sözlərinə görə, “İran tərəfi (COVAX vasitəsi ilə) 16,8 milyon doza vaksin əldə etməklə bağlı razılığa gəlmişdi”.
“Mən istəyərdim ki, bizim xalqımız açıq-aydın şəkildə Vaşinqtonun bu cinayətini anlasın”, – deyə İran prezidenti əlavə edib.
Xatırladaq ki, yanvar ayında İran hökumətinin rəsmisi Əli Rəbii bəyan etmişdi ki, Tehran COVAX-la danışıqlar aparıb və İran 16,8 milyon doza vaksin alacaq. Lakin daha sonra tədarüklə bağlı təxirlərin baş verdiyi elan edildi.
COVAX – ÜST-ün koronavirusa qarşı vaksinlərin tədarükü üçün başlatdığı beynəlxalq mexanizm.