Az.shafaqna.com xəbər verir ki bu, Yeni Zelandiyanın paytaxtı Vellinqtonda Antarktidadan daxil olan soyuq hava axınının təsiri nəticəsində son 15 ildə ilk dəfə qar yağıb.
Məlumata görə, avqustun 4-də ölkəyə çatan soyuq hava kütləsi şaxta, qar, dolu və güclü küləklə müşayiət olunub. Avqustun 5-i səhər Cənub adasında yerləşən üç yaşayış məntəqəsində havanın temperaturu -9 dərəcəyədək enib.
“MetService” meteoroloji xidməti bildirib ki, gün ərzində temperaturun nisbətən yüksələcəyi gözlənilsə də, gecə saatlarında yenidən kəskin soyuma baş verəcək. Proqnozlara əsasən, avqustun 6-sı səhər ölkənin bəzi bölgələrində bu ilin ən aşağı temperaturu qeydə alına bilər.
Yeni Zelandiyanın milli elektrik şəbəkəsinin operatoru “Transpower” isə açıqlayıb ki, avqustun 5-i səhər pik saatlarda elektrik enerjisinə tələbat rekord səviyyəyə çatıb. Şirkət həmçinin avqustun 6-sı səhər elektrik enerjisi çatışmazlığı yaranması riskinin olduğunu da bildirib.
