Az.shafaqna.com xəbər verir ki, İordaniyada ABŞ Mərkəzi Komandanlığı (CENTCOM) və müttəfiq qüvvələrin İranın ballistik raket və PUA hücumlarına qarşı həyata keçirdiyi müdafiə əməliyyatları zamanı ABŞ ordusunun iki hərbi qulluqçusu həlak olub.
CENTCOM-dan verilən rəsmi açıqlamaya görə, iyulun 17-də baş verən şiddətli qarşıdurma zamanı daha bir hərbçi isə itkin düşüb. Hazırda onun axtarışları davam etdirilir.
Hücum zamanı xəsarət alan dörd amerikalı hərbçi təcili olaraq İordaniyadakı xəstəxanalara təxliyə edilib. Tibbi yardımdan sonra onların artıq evə buraxıldığı bildirilir. Yüngül xəsarətlər alan digər hərbi personal isə ilkin tibbi müayinədən sonra yenidən öz xidməti vəzifələrinin icrasına qayıdıb.
CENTCOM-un bəyanatında deyilir: “Həlak olan döyüşçülərin ailələrinin hüquqlarına və hisslərinə hörmət əlaməti olaraq, onların şəxsiyyəti və hadisənin təfərrüatları barədə əlavə məlumatlar yaxınlarına rəsmi bildiriş verildikdən 24 saat sonra ictimaiyyətə açıqlanacaq.”
