Az.shafaqna.com, xəbər verir ki, İran hakimiyyəti 18 iyun 2026-cı il tarixində ABŞ ilə münaqişənin nizamlanmasına dair imzalanmış memorandum üzrə üzərinə götürdüyü öhdəliklərin icrasını dayandırıb. Bu barədə İran xarici işlər nazirinin müavini Kazım Qəribabadi məlumat verib.
“Biz də öz öhdəliklərimizin icrasını dayandırmışıq. Hazırda onları həyata keçirmirik və ölkənin müdafiəsi ilə məşğuluq”, – deyə Tasnim agentliyi onun sözlərini sitat gətirib.
ABŞ–İran münasibətlərində növbəti gərginlik mərhələsi iyulun 8-də başlayıb. ABŞ Silahlı Qüvvələri Vaşinqton və Tehran arasında memorandum imzalandıqdan sonra ilk dəfə olaraq, Hörmüz boğazında ticarət gəmisinə hücuma cavab olduğu iddiası ilə İran ərazisinə bir neçə dalğa hava zərbəsi endirib.
Həmin gün ABŞ Prezidenti Donald Tramp İranla əldə olunmuş atəşkəsin dayandırıldığını bəyan edib. Buna cavab olaraq Tehran Bəhreyn, İordaniya, Qətər, Küveyt, BƏƏ və Oman ərazisində yerləşən ABŞ obyektlərinə zərbələr endirməyə başlayıb.
