Az.shafaqna.com xəbər verir ki, Gürcüstanın baş naziri və prezidenti ölkənin pravoslav kilsəsinə yeni rəhbərin seçilməsini milli və mənəvi həyatın tarixi səhifəsi kimi qiymətləndirərək, 142-ci Katolikos-Patriarx Şio Üçüncüyə təbriklərini ünvanlayıblar.
Baş nazir İrakli Kobaxidze Şio Mucirinin (Şio Üçüncü) bu yüksək və məsuliyyətli missiyaya seçilməsi münasibətilə xalqa və yeni mənəvi rəhbərə müraciət edib. Hökumət başçısı vurğulayıb ki, yeni patriarx onilliklər ərzində İkinci İliya tərəfindən böyük müdrikliklə formalaşdırılmış mənəvi irsi layiqincə davam etdirəcəkdir. Kobaxidze ana kilsənin Gürcüstan dövlətçiliyinin sarsılmaz dayağı olduğunu qeyd edərək, Şio Üçüncünün ruhani rəhbərliyinin ölkənin sülhsevər və güclü gələcəyinə xidmət edəcəyinə əminliyini bildirib.
Eyni zamanda, Mixeil Kavelaşvili də yeni Katolikos-Patriarxı təbrik edərək, bu hadisənin ölkənin birliyi və çoxəsrlik ənənələri üçün müstəsna əhəmiyyət kəsb etdiyini diqqətə çatdırıb. O, patriarxın cəmiyyətdə sülh və qarşılıqlı hörmətin bərqərar olmasındakı rolunu xüsusi qeyd edərək, Şio Üçüncünün rəhbərliyi dövründə Gürcüstan Pravoslav Kilsəsinin daha da güclənəcəyinə ümidvar olduğunu ifadə edib.
Rəsmilər yeni seçilmiş patriarxa vətən və kilsə naminə fəaliyyətində uğurlar arzulayaraq, bu seçimin bütün vətəndaşlar üçün xeyirli olacağını vurğulayıblar.
