Çin alimləri yağış damcılarının enerjisindən elektrik əldə etməyə imkan verən yeni texnologiya hazırlayıblar. Bu sistem günəş işığı olmadıqda belə LED lampaları və müxtəlif sensorları işlədə bilir.
Az.shafaqna.com xəbər verir ki, W-DEG adlanan bu qurğu suyun üzərində yerləşən çox nazik plyonkadan ibarətdir. Yağış damcıları plyonkaya düşərkən kiçik elektrik impulsları yaradır və beləliklə enerji istehsal olunur.
Sınaqlar göstərib ki, cəmi 0,3 kvadratmetr ölçüdə olan prototip eyni anda 50 LED lampanı işlədə bilir. Qurğunun əsas üstünlüklərindən biri sudan həm dayaq, həm də elektrik dövrəsinin bir hissəsi kimi istifadə etməsidir ki, bu da həm çəkini, həm də istehsal xərclərini azaldır.
Nankin Aeronavtika və Astronavtika Universitetinin mütəxəssisləri bildirirlər ki, sistem analoji texnologiyalarla müqayisədə təxminən 87% daha yüngüldür və bu xüsusiyyət onu göl və su anbarlarında istifadə üçün əlverişli edir.
Alimlər qeyd edirlər ki, bu texnologiya günəş və ya külək enerjisini əvəz etməsə də, xüsusilə uzunmüddətli buludlu hava şəraitində əlavə enerji mənbəyi kimi faydalı ola bilər.
Qurğu çirkli suda və 10–50°C temperatur aralığında işləyə bilir. Bununla belə, geniş istehsala keçmək üçün suyun səthdə toplanmasının qarşısını alan drenaj sisteminin daha da təkmilləşdirilməsi tələb olunur.
