Az.shafaqna.com xəbər verir ki, İranın Məsləhət Şurasının üzvü Əli Əkbər Vilayəti ABŞ və Qərb ölkələrinin regional təhlükəsizlik siyasətini sərt tənqid edib. O, regiondakı strateji dəniz keçidlərinin təhlükəsizliyinin artıq regional ölkələr tərəfindən təmin edildiyini bəyan edib.
Vilayəti rəsmi “X” sosial media platformasında yaydığı açıqlamada “okeanın o tayından tətbiq edilən təhlükəsizlik dövrünün bitdiyini” vurğulayıb. Siyasətçi regionun dəniz təhlükəsizliyinin artıq birtərəfli qaydada həll edilə bilməyəcəyini qeyd edərək, hər hansı bir təxribatın “zəncirvari reaksiyaya” səbəb olacağı barədə xəbərdarlıq edib.
İranlı rəsmi bildirib ki, Hörmüz və Malakka boğazlarında İran və müttəfiqlərinin nüfuzu, Bab əl-Məndəb boğazında isə Ənsarullah hərəkatının nəzarəti təhlükəsizliyin əsas təminatçısıdır.
Parisdə keçirilən beynəlxalq görüşlərə toxunan Əli Əkbər Vilayəti, Britaniya və Fransanın dəniz təhlükəsizliyi ilə bağlı narahatlıqlarını regiondan kənara, öz problemlərinə yönəltmələrini tövsiyə edib. O, İngilis kanalı və Cəbəllütariq boğazını nümunə göstərərək, həmin ölkələrin diqqətlərini bu bölgələrdəki məsələlərə cəmləməli olduqlarını qeyd edib.
Vilayəti, İspaniyanın regional məsələlərdə nümayiş etdirdiyi müstəqil və balanslı yanaşmanı isə müsbət inkişaf kimi xarakterizə edib və bunu təqdir etdiklərini bildirib.
