Yaxın Şərqdə davam edən müharibə fonunda neftin bahalaşması Avrozonada inflyasiyanın artmasına səbəb olub.
Az.shafaqna.com xəbər verir ki, bu ilin mart ayında Avrozonada illik inflyasiya 2,5% təşkil edib. Bu göstərici fevral ayındakı 1,9%-lə müqayisədə daha yüksəkdir və 2025-ci ilin yanvarından bəri ən yüksək səviyyə sayılır.
Buna baxmayaraq, enerji qiymətlərində ciddi artım olsa da, inflyasiya analitiklərin gözləntilərindən bir qədər aşağı qalıb. İqtisadçılar 2,6%-lik artım proqnozlaşdırırdılar. Avropa Mərkəzi Bankı isə inflyasiyanı 2% səviyyəsində saxlamağı hədəfləyir.
Məlumatda qeyd olunur ki, fevralda enerji qiymətləri illik müqayisədə 3,1% azaldığı halda, martda təxminən 4,9% artdığı ehtimal edilir. Qida, alkoqol və tütün məhsulları 2,4%, xidmətlər isə 3,2% bahalaşıb.
Ölkələr üzrə isə ən yüksək inflyasiya Xorvatiya (4,7%), Litva (4,5%), Lüksemburq (3,8%) və Slovakiyada (3,7%) qeydə alınıb. Ən aşağı artım isə Kipr və İtaliyada (hər biri 1,5%) və Fransada (1,9%) müşahidə edilib.
