Avropa İttifaqının (Aİ) Gürcüstana qarşı qərarları artıq çoxdandır ədalətsizdir.
Az.shafaqna.com xəbər verir ki, bu barədə Gürcüstan parlamentinin sədri Şalva Papuaşvili bəyan edib.
O deyib ki, Brüssel ilə konstruktiv dialoq isə yalnız Aİ rəhbərliyinin dəyişməsindən sonra mümkündür.
“Brüsselin qərarlarında məntiq axtarmayın. Bu prosesdə biz heç nəyi istisna etmirik, lakim bir şeyi dəqiq bilirik: biz heç bir siyasi şantajın müqabilində suverenliyimizdən keçməyəcəyik“, – deyə spiker qeyd edib.
Papuaşvili əlavə edib ki, Gürcüstan xalqı da Avropanın qərarlarının əsl motivlərini bilir.
“Burada ədalət və obyekt kriteriyalar yoxdur, yalnız zərərli məqsəd var: Gürcüstana və onun vətəndaşlarına ziyan vurmaq“, – deyə o bildirib.
“Bu, Brüsselin bürokratiyasının və onun təcrübəsiz diplomatiyasının səbəb olduğu acı nəticədir. Onlar Aİ və Brüsseli Gürcüstan xalqının gözündə nüfuzdan salıblar“, – deyə o qeyd edib.
Papuaşvilinin sözlərinə görə, Brüssel rəhbərliyi bu gün Avropa xalqlarının maraqlarını təmsil etmir, öz siyasi gündəliyi əsasında hərəkət edir ki, bu da ortaq dilin tapılmasını qeyri-mümkün edir.
“Avropa İttifaqını sivilizasiyanın uçurumuna gətirib çıxaran bürokratiya ilə necə ortaq dil tapmaq olar?.. Biz Brüsselə ölkəmizi dağıtmağa imkan verməyəcəyik. Onların Aİ-nin özü ilə etdikləri onlar üçün bəsdir”, – deyə o vurğulayıb.
Parlamentin sədri deyib ki, Avropa iqtisadi durğunluq vəziyyətindədir, Aİ isə eskalasiyaya köklənmiş struktura çevrilib.
“Bu cür bürokratiya ilə ortaq dil tapmaq olmur, ona görə də əsas xətt – Brüssel rəhbərliyi dəyişməlidr. Avropa xalqları da hər gün daha da çox buna etiraz edirlər. Brüssel Avropa xalqlarına qulaq asan kimi, bizim münasibətlərimizin tam yoluna qoyulması mümkün olacaq”, – deyə o əlavə edib.
