Az.shafaqna.com xəbər verir ki, Gürcüstan Daxili İşlər Nazirliyi akustik silahların, gözyaşardıcı qaz balonlarının və elektroşokerlərin mülki dövriyyəsini daha ciddi qaydalarla tənzimləmək üçün yeni qanun layihəsi hazırlayıb.
Nazirlik bildirir ki, təklif olunan dəyişikliklərin əsas məqsədi ictimai asayişi daha effektiv qorumaq və mümkün hüquq pozuntularının qarşısını almaqdır. Layihə artıq parlamentə təqdim edilib.
Yeni qaydalara görə:
• Akustik silahlar – yalnız boş patronla atəş açan və teatr tamaşaları, kino, paradlar, idman tədbirləri kimi məkanlarda istifadə olunan səsli silahların ölkəyə gətirilməsi xüsusi icazə ilə olacaq. Onların daşınması və ötürülməsi də polis nəzarəti altında həyata keçiriləcək. Polis həm alınacaq silahların miqdarı, həm də onların əldə edilmə tezliyi üzrə məhdudiyyətlər tətbiq edə biləcək.
• Gözyaşardıcı qaz balonları – bibər qazı balonlarının ölkəyə gətirilməsi yalnız icazə ilə mümkün olacaq. Bu vasitələri almaq üçün vətəndaşın 18 yaşı tamam olmalı və DİN-in yerli idarəsindən arayış təqdim etməlidir.
• Elektroşokerlər – bu cihazların mülki dövriyyəsi tam qadağan edilir. Onlardan yalnız dövlət qurumları və xüsusi mühafizə şirkətləri istifadə edə biləcək.
