“Əminəm ki, Robin Danigan 26 May tədbirində iştirak etmək istədi, lakin ona bu imkan verilmədi. (məhz dərin dövlət’in (deep state) təsiri səbəbindən).”
Az.shafaqna.com xəbər verir ki, bunu Grcüstanın Baş naziri İrakli Kobaxidze jurnalistlərə bildirib.
Baş nazirin sözlərinə görə, ABŞ Dövlət Departamenti tərəfindən ünvan göstərilmədən təbrik yayımlandı ki, bu da düzgün yanaşma deyil və “dərin dövlət”in təsirinə işarə edir.
“Dövlətimizdə xalq tərəfindən seçilən hakimiyyət fəaliyyət göstərir və bu bölünmə təkcə süni və ədalətsiz deyil, həm də gürcü xalqı üçün təhqiredicidir. Gürcü xalqı öz hakimiyyətini seçir – bu keçən il 26 oktyabrda belə oldu, 1 milyon 120 mindən çox insan hazırkı hakimiyyəti dəstəklədi. Bu kiminsə xoşuna gələ bilər və ya gəlməyə bilər, amma bu onların işi deyil – bu gürcü xalqının seçimidir və hakimiyyətlə bağlı seçim yalnız gürcü xalqının işidir. Təbriklərə gəldikdə, ABŞ-dan, Dövlət Departamentindən ünvan göstərilmədən təbrik yayımlandı. Elçinin tədbirdə iştirak etməməsinin səbəbi olaraq bildirildi ki, o, Tbilisidə deyil. Sonradan açıqlandı ki, ümumiyyətlə Gürcüstanda deyilmiş. Bu, əlbəttə ki, düzgün yanaşma deyil. ABŞ-da da Tramp administrasiyası ilə ‘dərin dövlət’ arasında mübarizə gedir. Bu halda aydın şəkildə göründü ki, Dövlət Departamenti xətti ilə ‘dərin dövlət’ üstünlük təşkil edir və gördüyümüz aktlar da bununla bağlıdır,” – deyə baş nazir bildirib.
İrakli Kobaxidzenin fikrincə, bu, düzgün münasibət deyil.
“Xatırlayırsınızsa, qeyri-hökumət təşkilatları (QHT) vasitəsilə Gürcüstanda Amerikanın yardımı ilə bağlı virtual reallıq yaradılırdı. Məktubumda dəqiq rəqəmlər göstərdim ki, bu da sübut edir: biz ABŞ üçün, xüsusən də hərbi missiyalarda iştirakımızla, aldığımız yardımdan daha çox güzəşt göstərmişik. Yardıma, əlbəttə, QHT-lərə ayrılan vəsaitlər daxil deyil. Tramp administrasiyası da qeyd etmişdi ki, QHT-lərə ayrılan pul heç bir yardım sayılmır. Eyni zamanda, 2008-ci il müharibəsindən sonra Saakaşvilinin rejimini xilas etmək üçün ayrılan vəsait də yardım sayıla bilməz. Bunları çıxsaq və real yardımı hesablasaq, rəqəmlər bizim ABŞ tərəfinə yalnız Əfqanıstan və İraqda iştirakımızla verdiyimiz güzəştlərdən təxminən 5 dəfə az olacaq. Ona görə də təkəbbürün əsası yoxdur. Həmçinin, daim ‘ABŞ dəstəyi olmasa, Gürcüstan mövcud olmazdı’ demək də yolverilməzdir. Bizim ölkəmiz 3000 ildir mövcuddur. Dövlətçiliyimiz 23 əsrdir mövcuddur. Təkəbbürün heç bir əsası yoxdur. ‘Dərin dövlət’ güclüdür – bunu görürük. Əgər ‘dərin dövlət’ ABŞ-ın təbriklərini müəyyənləşdirəcəksə, bu təbriklərin bizim üçün heç bir dəyəri yoxdur,” – deyə baş nazir əlavə edib.
İrakli Kobaxidzenin sözlərinə görə, bu, bürokratiyada kök salmış sistemdir və mübarizə gedir.
“Əminəm ki, Robin Danigan 26 May tədbirində iştirak etmək istəyirdi, amma bu imkan ona ‘dərin dövlət’in təsiri səbəbindən verilmədi. Yayılan bəyanatda da aydın şəkildə ‘dərin dövlət’in təsiri hiss olunur. Bu, bu günün reallığıdır. Belə bir təbrikin bizim üçün heç bir dəyəri yoxdur. Tramp administrasiyasına gəlincə, ümid edirəm ki, o, ‘dərin dövlət’ə qalib gələcək. Bu, Gürcüstan-Amerika münasibətlərinin sağlamlaşması üçün zəruridir,” – deyə İrakli Kobaxidze bildirib.
