Az.shafaqna.com-un verdiyi xəbərə görə, Sudan Səhiyyə İşçiləri həmkarlar ittifaqı ölkənin qərbindəki Darfur əyalətinin Əl-Cuneyna şəhərində yenidən alovlanan toqquşmalar nəticəsində onlarla insanın həyatını itirdiyini və yaralandığını açıqlayıb.
Həmkarlar İttifaqından verilən məlumatda deyilir: ”Əl-Cuneyna şəhərində yenidən münaqişələr başlayıb. Əl-Cuneyna Xəstəxanası, səhiyyə ocaqları, könüllü təşkilatların mərkəzləri, beynəlxalq təşkilatlar və banklar talan edilib və yandırılıb”.
Məlumatda gərgin təhlükəsizlik vəziyyəti və mülki şəxslərə qarşı davam edən hücumlar səbəbindən ölən və yaralananların sayının hələ dəqiqləşdirilmədiyi bildirilib.
Bu arada, Sudan Xarici İşlər Nazirliyi ordu ilə döyüşən xüsusi təyinatlı qüvvələrə işarə edərək “üsyançılarla” danışıqların aparılmayacağını bəyan edib.
Nazirlikdən verilən açıqlamada xüsusi təyinatlı qüvvələrin atəşkəsi pozduğu bildirilib.
Açıqlamada deyilir: “Xüsusi təyinatlı qüvvələr vətəndaşlara və onların əmlakına hücum edərək, diplomatik nümayəndəliklərə hücum edərək və diplomatları öldürərək, xəstəxanalara və səhiyyə ocaqlarına hücum edib dağıdaraq, ölkənin infrastrukturunu məhv edərək beynəlxalq humanitar hüquq normalarını kobud şəkildə pozur”.
Açıqlamada ordunun xüsusi təyinatlı qüvvələr ilə danışıqlar aparacağı ilə bağlı yayılan iddiaların həqiqəti əks etdirmədiyi və “üsyançıların” təslim olmaqdan və ya məhv olmaqdan başqa çarəsinin olmadığı vurğulanıb.
Digər tərəfdən, Sudan ordusu Səudiyyə Ərəbistanı və Amerika Birləşmiş Ştatlarının (ABŞ) səyləri ilə atəşkəsin daha 72 saat uzadılmasına qərar verdiyini açıqlayıb.
Ordudan verilən açıqlamada deyilir: “Silahlı Qüvvələr Komandanlığı Səudiyyə Ərəbistanı və ABŞ tərəflərinin əcnəbilərin təxliyəsi üçün əlverişli şəraitin yaradılması və Sudan xalqının humanitar vəziyyətinin asanlaşdırılması üçün atəşkəs rejiminin daha 72 saat uzadılmasına qərar verib”.
Aprelin 25-də ABŞ-ın vasitəçiliyi ilə ölkədə 72 saatlıq atəşkəs elan edilib. Bu atəşkəs bu gecə yarısından etibarən bitməli idi.
Şərqi Afrika Hökumətlərarası İnkişaf Təşkilatı (IGAD) dünən mövcud atəşkəsin 72 saat uzadılması və silahlı qüvvələr və xüsusi təyinatlı qüvvələrin nümayəndələrinin danışıqlar aparmaq üçün Cənubi Sudanın paytaxtı Cubaya getməsi üçün hərəkətə keçib.
Sudan ordusu ordu komandanı general Əbdülfəttah əl-Burhanın bu addımı müsbət qiymətləndirdiyini açıqlayıb.
Xüsusi təyinatlı qüvvələr atəşkəs və görüşlə bağlı hələlik açıqlama verməyib.
Birləşmiş Millətlər Təşkilatının Sudandakı humanitar məsələlər üzrə koordinator müavini Abdou Dienq atəşkəsə əlavə olaraq Sudanda təcili humanitar yardım dəhlizinin açılmasının vacibliyini qeyd edib.
Sudanda atəşkəs cəhdlərinə baxmayaraq münaqişənin davam etdiyini qeyd edən Dienq humanitar yardım səylərinin həyata keçirilə bilməyəcəyini bildirib.
Abdou Dienq həmçinin sudanlıların Cənubi Sudan, Misir, Çad və Efiopiyaya qaçmağa çalışdığını bildirib.
BMT Baş katibinin sözçünün müavini Farhan Haq keçirdiyi gündəlik mətbuat konfransında BMT-nin Uşaq Fondundan (UNICEF) əldə etdiyi məlumata görə, Sudandakı qarşıdurmalarda 9 uşağın həyatını itirdiyini bildirib.
Haq 50 uşağın yaralandığını, 50 minə yaxın uşağın ərzaq çatışmazlığı ilə üzləşdiyini qeyd edib.
BMT baş katibinin humanitar məsələlər üzrə köməkçisi və fövqəladə hallar üzrə koordinatoru Martin Qriffits Sudandan Çada tranzit keçən insanlar üçün BMT-nin Mərkəzi Fövqəladə Hallar Fondundan (CERF) 3 milyon dollar ayrıldığını açıqlayıb.
Təxminən 20 min insanın sərhədi keçdiyini ifadə edən Griffits yardımın təcili ehtiyacların ödənilməsi üçün istifadə ediləcəyini açıqlayıb.
